WALIMU WA SHULE YA MSINGI KIGONGONI WAJISAIDIA PORINI BAADA YA KUKOSA CHOO

Shule ya msingi Kigongoni  iliyoko wilayani Monduli mkoani Arusha  inakabiliwa  na tatizo  kubwa  la ukosefu wa choo  unaosababisha  wanafunzi  zaidi  ya  elfu moja (1,000) kutumia  matundu  manne  ya choo  yenye  hali  mbaya ,huku walimu  wakilazimika kupata huduma  hiyo vichakani  hali inayotishia usalama  wa afya zao  na wanafunzi  wao.

Kufuatia hali hiyo benki ya(TPB) imetoa mchango wa milioni sita ambazo  zimewezesha  kujenga  matundu 18 ya vyoo ,msaada  ambao wanafunzi ,walimu na viongozi  wa kamati ya shule  pamoja  na  kushukuru  wamesema umepunguza ukubwa wa tatizo  na  lakini  bado mahitaji  ni makubwa hasa kwa walimu.

Watendaji wa benki hiyo akiwemo mkurugenzi  wa TEHAMA  Bw. Jema Msuya  na  meneja wa TPB mkoa wa Arusha  Bw. Ayubu  Sapi Mkwawa  wamesema  hatua hiyo ni sehemu ya utekelezaji  wa utaratibu waliojiwekea  wa kurudisha  sehemu ya faida  kwa wananchi.

Afisa elimu ya msingi wa wilaya ya Monduli Bi.Teresia Krara amesema  asilimia  kubwa  ya  shule  za  msingi  bado  zina  mahitaji   makubwa  na  pamoja  na  kuishukuru  benk  hiyo amewaomba wadau  wengine  wakiwemo  wawekezaji, mashirika,taasisi na wananchi  wenye  uwezo  kuona umuhimu  wa kusaidia  elimu.

Shule hiyo  yenye walimu 22 ambayo pia inakabiliwa  na tatizo la uhaba wa vyumba vya madarasa  na  nyumba  za  walimu  iko katika ukanda wa bonde la ufa ambalo asilimia kubwa ya wananchi  ni   wakulima  wakubwa  wa  ndizi  na  mboga  mboga  na pia imezungukwa na hifadhi ya taifa ya ziwa Manyara.

#ITV